Toutes les villes de la Doulce France retentissaient donc des cris de vendeurs ambulants : "marchands à découvert", à la tablette ", "hors la Halle"...Ces vendeurs sont dénonçés comme des concurrents déloyaux par les commerçants ayant pignon sur rue, sauf lorsqu'ils leur permettent de se débarrasser discrètement de marchandises de second choix indigne d'un étal...

A. Franklin, "les rues et les cris de Paris au XIIIème siècle". Paris 1874

Les Crieries de Paris

Un noviau Dit ici nous trueve
Guillaume de la Vile nueve.
Puis que povretez le justice,
Or vous dirai en quele guise
Et en quele maniere vont
Cil qui denrees a vendre ont,
Et qui penssent de lor preu fere,
Que ja ne fineront de brere
Parmi Paris jusqu'a la nuit.
Ne cuidiez vous qu'il lor anuit,
Que ja ne seront a sejor.
Oiez c'on crie au point du jor :
Seignor, quar vous alez baingnier
Et estuver sanz delaier,
Li baing sont chaut, c'est sanz mentir.
Puis aprés orrez retentir
De cels qui les fres harens crient.
Or au vivet, li autre dient.
Sor et blanc harenc, fres poudré,
Harenc nostre, vendre voudré.
Menuise vive orrez crier
Et puis aletes de la mer.
Oisons, pijons, et char salee,
Char fresche moult bien conraee,
Et de l'aillie a grant plenté.
Or au miel, Diex vous doinst santé!
Et puis aprés, pois chaus pilez,
Et feves chaudes par delez.
Aus et oingnons a longue alaine.
Puis aprés cresson de fontaine,
Cerfueil, porpié, tout de venue.
Puis aprés porete menue,
Letues fresches demanois,
Vez ci bon cresson orlenois.
Li autres crie par dalez :
J'ai bons mellenz fres et salez,
L'aguille por le viez fer ai,
Or ça bon marchié en ferai.
L'eve por pain, qui veut, si praingne.
J'ai bon frommage de Champaingne,
Or i a frommage de Brie.
Au burre fres n'oublie mie.
Or i a gruel et forment
Bien pilé et menuement;
Farine pilee, farine.
Au lait, commere, ça voisine.
Cras pois i a, aoust de pesches,
Poires de Chaillou, et nois fresches;
Primes ai pommes de rouviau,
Et d'Auvergne le blanc duriau.
Al balais, si com je l'enten.
L'autres crie qui veut le ten.
L'autres crie la busche bone,
A .ij. oboles le vous done.
Huile de nois, or au cerniaus,
Vinaigre qui est bons et biaus,
Vinaigre de moustarde i a.
Diex! A il point de lie la?
J'ai cerises, or au verjus.
Or a la poree ça jus;
Or i a oés, or aus, poriaus.
Chaus pastez i a, chaus gastiaus.
Or i a poisson de Bondies.
Chaudes oublees renforcies,
Galetes chaudes, eschaudez,
Roinssoles, ça denree aus dez.
Cote et la chape par covent,
Clerc i sont engané sovent.
Cote et sorcot rafeteroie,
Et le cuvier relieroie.
Huche et le banc sai bien refere,
Je sai moult bien que je sai fere.
J'ai joncheure de jagliaus,
Herbe fresche. Les viez housiaus,
Les sollers viez. Et soir et maïn:
Aus Freres de Saint Jaque, pain,
Pain por Dieu aus Freres Menors :
Cels tieng je por bons preneors
Aus Freres de saint Augustin.
Icil vont criant par matin :
Du pain aus Sas, pain aus Barrez,
Aus povres prisons enserrez,
A cels du Val des Escoliers.
Li .i. avant, li autre arriers,
Aus Freres des Pies demandent,
Et li Croisié. Pas nes atandent,
A pain crier metent grant paine,
Et li avugle a haute alaine,
Du pain a cels de Champ porri
Dont moult sovent, sachiez, me ri.
Les Bons Enfanz orrez crier :
Du pain, nes vueil pas oublier.
Les filles Dieu sevent bien dire :
Du pain, por Jhesu nostre Sire.
Ça du pain, por Dieu, aus Sachesses.
Par ces rues sont granz les presses,
Je vous di de ces genz menues.
Orrez crier parmi ces rues :
Menjue pain! Diex, qui m'apele?
Vien ça, vuide ceste escuele.
Or viengne avant gaaigne pain.
J'esclarciroie pos d'estain,
Je relieroie hanas.
Du poivre por le denier qu'as.
Or aus poires de hastivel.
Jorroises ai a grant revel.
Fres jonc a moult grant alenee,
Or ça a la longue denree.
Noël, Noël, a moult granz cris,
J'ai raïs de l'archaut, raïs.
Cil qui crie, biau se deporte :
Qui vent le viez fer, si l'aporte.

Li autres dit autres noveles,
Qui vent viez pos, et viez paieles.
Li autres crie a grant friçon :
Qui a mantel ne peliçon,
Si le m'aport a rafetier.
Li autres crie son mestier :
Chandoile de coton, chandoile,
Qui plus art cler que nule estoile.
Aucune foiz, ce m'est avis,
Crie on le ban le roi Loys.
Si crie l'en en plusors leus
Le bon vin fort a .xxxii.,
A .xvi., a .xij., a .vj., a .viij. ;
Moult mainent crieor grant bruit.
Crier orrez : qui a a moudre?
J'aporte bones nois de coudre.
Les flaons chaus pas nes oublie.
J'ai chastaingnes de Lombardie,
Figues de Melite sanz fin ;
J'ai roisin d'outre mer, roisin.
J'ai porees et s'ai naviaus.
J'ai pois en cosse toz noviaus.
L'autres crie feves noveles,
Si les mesure a escueles.
Hanni d'aoust flerant com bausme.
L'autres crie : chaume, i a chaume,
J'ai jonc paré por metre en lampes,
Bones eschaloingnes d'Estampes.
J'ai savon d'outre mer, savon.
Des poires de saint Riule avon.
L'autres crie sanz delaier :
Je sers de pingnes [a] resoier.
Quant mort i a homme ne fame,
Crier orrez : proiez por s'ame,
A la sonete par ces rues.
Dont orrez autres genz menues
Poires d'angoisse crier haut.
L'autres pommes rouges qui vaut.
Aiglentier por du pain l'en crie,
Verjus de grain a fere aillie.
Li uns borgons, l'autres veilles.
Cornilles meures, cornilles.
Alies i a d'aliïer.
Or i a boutons d'aiglentier ;
Proneles de haie vendroie.
Oiselés por du pain donroie.
Nates i a, et naterons.
Cerciaus de bois vendre volons.
L'autres crie : gastiaus rastis,
Je les aporte toz fetis,
Chaudes tartes et siminiaus.
L'autres crie : chapiaus, chapiaus.
Gastel a feve orroiz crier,
Charbon le sac por .i. denier.
Nefles meures ai a vendre.
Le soir orrez sanz plus atendre,
A haute voiz sanz delaier :
Diex! Qui apele l'oubloier?
Quant en aucun leu a perdu,
De crier n'est mie esperdu,
Prés de l'uis crie ou a esté :
Aïde Diex de Maïsté!
Com de male eure je fui nez!
Com par sui or mal assenez!
Et autres choses assez crie,
Que raconter ne vous sai mie.
Tant y a denrees a vendre,
Tenir ne me puis de despendre.
Que se j'avoie grant avoir,
Et de chascun vousisse avoir
De son mestier une denree,
Il auroit moult corte duree.
Tant poi i ai mis que j'avoie,
Tant que povretez me mestroie.
Aprés mise ma robe robe jé,
Lecherie m'a desrobé.
Si ne sai mes que devenir,
Ne quel chemin puisse tenir.
Fortune m'a mis en sa roë,
Chascuns me gabe et fet la moë.
Si ferai, puis que sui en queche,
Du meillor fust que j'aurai fleche.
Expliciunt les Crieries de Paris.